உந்தன் வாசம்

இன்னும் கேட்கிறது உன் குரல்
எதிலும்  நிறைகிறது உன் முகம்
இருட்டிலும் தெரிகிறது உன் நிழல்
காற்றில் வருகிறது உன் வாசம்
இன்றும் என்றும் என் வாழ்வில்
வந்து போகும் அத்தனை மகிழ்ச்சியிலும்
உந்தன் வாசம் தினமும் வீசும்..

உண்மையில் நீ இல்லை

எண்ணம் ஒன்று சேர
கண்ணில் நீர் வழிய
மனதில் சஞ்சலத்துடன்
மருகி மன்றாட

உண்ண நினைவில்லாமல்
உறக்கம் உணராமல்
உந்தன் பெயரை நொடிக்கொருமுறை
உதடு சொல்ல

கண்ணுறங்காது காவல் காத்திருக்க
கண்ணிமைக்கும் பொழுதில்
கணநொடியில் வாழ்வை நீ
தட்டி பறிக்க

தவமிருந்தும் பயனில்லை
விழித்திருந்தும் விடையில்லை
உண்மையில் நீ இல்லை!

சிறகுகள் முளைக்கும்

முட்டையை எடுத்து மூடி வைத்து
குஞ்சு பொரித்ததும் மறைத்து காத்து
குழந்தை போல வளர்க்கலாம் கொஞ்சகாலம்
நித்தம் நித்தம் அது தானாய் வளரும்

கொஞ்சம் கொஞ்மாய் காரணம் படிக்கும்
கேள்வி கேட்டு தினம் நச்சரிக்கும்
கொஞ்ச காலம் தத்தளிக்கும்
காவலில் இருப்பதை கண்டுபிடிக்கும்

சின்ன சின்னதாய் சினமும் கொள்ளும்
செய்வதரியாது முரண்டு பிடிக்கும்
முட்டிமோதி அட ஆர்ப்பரிக்கும்
ஆசை கனவை அடைய நினைக்கும்

வாழ்க்கை பயனை காண நினைக்கும்
வண்ண வண்ணமாய் சிறகும் முளைக்கும்
வெடவெடவென விண்ணில் பறக்கும்
வானவில்லையும் வளைத்து ஒடிக்கும்..